我一路都好想過一個白色浪漫聖誕，不過朋友仔聖誕請唔到假，我哋趁月頭未加假去北海道預祝聖誕都好丫。
我哋最主要嘅目標係大通公園入面個札幌聖誕市集；其實每到聖誕，歐洲城市中以德國聖誕市集最出名，而呢個市集就係仿照慕尼黑聖誕市集建成。為咗要影靚靚燈飾相，我哋下晏四點，啱啱著燈就去到大通公園；估唔到北海道冬天呢個時候已經差唔多天都黑晒。早少少去到趁個天仲有一抹藍色，影出黎啲相效果先夠夢幻！
雖然都好凍下，不過全場有成37萬個燈泡，同時亮起真係全日本數一數二、甚至係我人生中見過最夢幻嘅燈飾呀！為左影晒全場燈飾，我哋仲特登上去札幌電視塔，估唔到影出黎好似成條機場爬道咁！
市集入面有成25間來自德國同日本嘅聖誕精品店，仲有好多德國食物，好似德國傳統薑餅、大肉腸、薄餅……但我最欣賞都係熱辣辣嘅德國蘋果酒呀！平時白酒都係雪凍飲，不過天寒地凍，一杯溫笠笠嘅蘋果酒加埋玉桂，唔單止香噴噴，仲可以暖手同暖心添！
 

^^